ਨਵੀਂ ਦਿੱਲੀ : ਐੱਮ.ਐੱਸ.ਧੋਨੀ ਦੇ ਕਪਤਾਨ ਦੇ ਕਾਰਜਕਾਲ ਦੌਰਾਨ ਕਈ ਨੌਜਵਾਨ ਖਿਡਾਰੀ ਭਾਰਤੀ ਜਰਸੀ ‘ਚ ਅੰਤਰਰਾਸ਼ਟਰੀ ਕ੍ਰਿਕਟ ਮੰਚ ‘ਤੇ ਚਮਕੇ। ਕਈ ਖਿਡਾਰੀ ਲੰਬੀ ਦੌੜ ਦੇ ਘੋੜੇ ਸਾਬਤ ਹੋਏ, ਜਦੋਂ ਕਿ ਕਈ ਖਿਡਾਰੀਆਂ ਨੂੰ ਸਹੀ ਸਮੇਂ ‘ਤੇ ਲੋੜੀਂਦੇ ਮੌਕੇ ਨਹੀਂ ਮਿਲੇ। ਅਜਿਹਾ ਹੀ ਇੱਕ ਨਾਂ ਸੀ ਮਨੋਜ ਤਿਵਾੜੀ ਦਾ। ਮਨੋਜ ਨੇ ਅੰਤਰਰਾਸ਼ਟਰੀ ਕ੍ਰਿਕਟ ‘ਚ ਕੁਝ ਦਮਦਾਰ ਪਾਰੀਆਂ ਖੇਡੀਆਂ, ਜਦਕਿ ਘਰੇਲੂ ਕ੍ਰਿਕਟ ‘ਚ ਉਨ੍ਹਾਂ ਦਾ ਪ੍ਰਦਰਸ਼ਨ ਲਗਾਤਾਰ ਦਮਦਾਰ ਰਿਹਾ। ਹਾਲਾਂਕਿ ਮਨੋਜ ਉਨ੍ਹਾਂ ਬਦਕਿਸਮਤ ਖਿਡਾਰੀਆਂ ‘ਚੋਂ ਇਕ ਸੀ, ਜਿਨ੍ਹਾਂ ਨੂੰ ਆਪਣੀ ਕਾਬਲੀਅਤ ਦਿਖਾਉਣ ਦਾ ਜ਼ਿਆਦਾ ਮੌਕਾ ਨਹੀਂ ਮਿਲਿਆ। ਇਸ ਦੌਰਾਨ ਬੰਗਾਲ ਲਈ ਆਪਣੇ ਕਰੀਅਰ ਦਾ ਆਖਰੀ ਘਰੇਲੂ ਮੈਚ ਖੇਡਣ ਤੋਂ ਬਾਅਦ ਮਨੋਜ ਨੇ ਆਪਣੇ ਅੰਤਰਰਾਸ਼ਟਰੀ ਕਰੀਅਰ ਨੂੰ ਲੈ ਕੇ ਐੱਮਐੱਸ ਧੋਨੀ ‘ਤੇ ਵੱਡਾ ਦੋਸ਼ ਲਾਇਆ ਹੈ। ਮਨੋਜ ਤਿਵਾੜੀ ਨੇ ਘਰੇਲੂ ਕ੍ਰਿਕਟ ‘ਚ ਆਪਣਾ ਆਖਰੀ ਮੈਚ ਖੇਡਣ ਤੋਂ ਬਾਅਦ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ ਐੱਮਐੱਸ ਧੋਨੀ ‘ਤੇ ਨਿਸ਼ਾਨਾ ਸਾਧਿਆ। ਉਨ੍ਹਾਂ ਨੇ ਕਿਹਾ, “ਮੈਂ ਐੱਮ.ਐੱਸ. ਧੋਨੀ ਤੋਂ ਪੁੱਛਣਾ ਚਾਹੁੰਦਾ ਹਾਂ ਕਿ 2011 ‘ਚ ਸੈਂਕੜਾ ਲਗਾਉਣ ਦੇ ਬਾਵਜੂਦ ਮੈਨੂੰ ਪਲੇਇੰਗ ਇਲੈਵਨ ‘ਚੋਂ ਕਿਉਂ ਬਾਹਰ ਕੀਤਾ ਗਿਆ। ਮੇਰੇ ‘ਚ ਵੀ ਵਿਰਾਟ ਕੋਹਲੀ ਤੇ ਰੋਹਿਤ ਸ਼ਰਮਾ ਵਾਂਗ ਹੀਰੋ ਬਣਨ ਦੀ ਸਮਰੱਥਾ ਸੀ। ਅੱਜ ਮੈਂ ਦੇਖ ਰਿਹਾ ਹਾਂ ਕਿ ਕਈ ਖਿਡਾਰੀ ਹਨ ਨੂੰ ਮੌਕਾ ਦਿੱਤਾ ਜਾ ਰਿਹਾ ਹੈ, ਜਿਸ ਨੂੰ ਦੇਖ ਕੇ ਮੈਂ ਉਦਾਸ ਹਾਂ।” ਤੁਹਾਨੂੰ ਦੱਸ ਦੇਈਏ ਕਿ ਧੋਨੀ ਦੀ ਕਪਤਾਨੀ ‘ਚ ਮਨੋਜ ਤਿਵਾੜੀ ਨੂੰ ਕਈ ਮੌਕੇ ਨਹੀਂ ਮਿਲ ਸਕੇ। ਸੈਂਕੜਾ ਖੇਡਣ ਤੋਂ ਬਾਅਦ ਮਨੋਜ ਨੂੰ ਅਗਲੇ 14 ਮੈਚਾਂ ਲਈ ਬੈਂਚ ‘ਤੇ ਬੈਠਣਾ ਪਿਆ। ਨੋਜ ਤਿਵਾੜੀ ਨੇ 2008 ‘ਚ ਆਸਟ੍ਰੇਲੀਆ ਖਿਲਾਫ਼ ਅੰਤਰਰਾਸ਼ਟਰੀ ਕ੍ਰਿਕਟ ‘ਚ ਡੈਬਿਊ ਕੀਤਾ ਸੀ। ਮਨੋਜ ਨੂੰ ਵਿਸ਼ਵ ਪੱਧਰ ‘ਤੇ ਆਪਣੀ ਕਾਬਲੀਅਤ ਦਿਖਾਉਣ ਦਾ ਜ਼ਿਆਦਾ ਮੌਕਾ ਨਹੀਂ ਮਿਲਿਆ। ਮਨੋਜ ਨੇ ਆਪਣੇ ਕਰੀਅਰ ਦੌਰਾਨ ਖੇਡੇ ਗਏ ਕੁੱਲ 12 ਵਨਡੇ ਮੈਚਾਂ ਵਿੱਚ 26.09 ਦੀ ਔਸਤ ਨਾਲ 287 ਦੌੜਾਂ ਬਣਾਈਆਂ। ਇਸ ਦੌਰਾਨ ਮਨੋਜ ਨੇ ਇਕ ਸੈਂਕੜਾ ਅਤੇ ਇਕ ਅਰਧ ਸੈਂਕੜਾ ਲਗਾਇਆ। ਮਨੋਜ ਨੇ ਸਾਲ 2011 ਵਿੱਚ ਟੀ-20 ਅੰਤਰਰਾਸ਼ਟਰੀ ਕ੍ਰਿਕਟ ਵਿੱਚ ਡੈਬਿਊ ਕੀਤਾ ਸੀ। ਕ੍ਰਿਕਟ ਦੇ ਸਭ ਤੋਂ ਛੋਟੇ ਫਾਰਮੈਟ ‘ਚ ਮਨੋਜ ਨੂੰ ਸਿਰਫ਼ ਇਕ ਪਾਰੀ ‘ਚ ਬੱਲੇਬਾਜ਼ੀ ਕਰਨ ਦਾ ਮੌਕਾ ਮਿਲਿਆ, ਜਿਸ ‘ਚ ਉਸ ਨੇ 15 ਦੌੜਾਂ ਬਣਾਈਆਂ। ਮਨੋਜ ਨੇ ਆਪਣਾ ਆਖਰੀ ਵਨਡੇ ਮੈਚ 2015 ‘ਚ ਜ਼ਿੰਬਾਬਵੇ ਖਿਲਾਫ਼ ਖੇਡਿਆ ਸੀ, ਜਦਕਿ ਉਸਨੇ ਆਪਣਾ ਆਖਰੀ ਟੀ-20 ਅੰਤਰਰਾਸ਼ਟਰੀ ਮੈਚ 2012 ‘ਚ ਖੇਡਿਆ ਸੀ।